નવા વર્ષના પહેલા મહિનામાં રીલીઝ થશે સાત ગુજરાતી ફિલ્મો

મહિલા પ્રધાનથી માંડીને હોરર કોમેડી અને એક્શન થ્રિલર ફિલ્મ્સનો આનંદ માણવા મળશે આ પહેલા જ મહિનામાં

વર્ષ 2024માં કુલ 73 ફિલ્મો રિલીઝ થઈ હોવાની વાત આપણે પાછલા લેખમાં કરી હતી અને હવે નવા વર્ષ 2025 ના પહેલા જ મહિનામાં બે-ત્રણ નહીં પણ કુલ સાત અલગ અલગ પ્રકારની ફિલ્મો રિલીઝ થવાની છે. આ સાત ફિલ્મોમાંથી કુલ ચાર ફિલ્મ શરૂઆતના બે અઠવાડિયામાં જ રિલીઝ થશે એટલે કે ત્રીજી અને દસમી જાન્યુઆરીએ બે-બે ફિલ્મો વચ્ચે ક્લેશ થવા જઈ રહ્યો છે. 

  

સૌથી પહેલા વાત કરીયે તો વિશાલ વાડા વાલા ગયા વર્ષે ‘સમંદર’ અને ‘રામ ભરોસે’ જેવી ફિલ્મો લઈને આવ્યા હતા તેઓ આ વર્ષે તેમની બહુચર્ચિત ફિલ્મ ‘વિક્ટર 303’ લઈને આવ્યા છે જે આજે સિનેમા ઘરોમાં આવી ચૂકી છે. આ ફિલ્મમાં જગજીતસિંહ વઢેર, અંજલી બારોટ, અલીશા પ્રજાપતિ, ચેતન ધાનાણી, બિમલ ત્રિવેદી, નક્ષરાજ, અભિનય બેન્કર, કિશન ગઢવી, મયૂર સોનેજી જેવા અનેક કલાકારો જોવા મળશે. ‘સમંદર’ ની જેમ આ ફિલ્મ પણ એક્શન થ્રિલરનો અનુભવ કરાવશે, જેમાં ફરી એકવાર સંગીતની જવાબદારી કેદાર-ભાર્ગવે સંભાળી છે. ‘વિક્ટર 303’ સાથે એક અલગ પ્રકારનો વિષય લઈને દીક્ષા જોશી અને જયેશ મોરે અભિનીત ફિલ્મ ‘કાશી રાઘવ’ રિલીઝ થઈ છે. આ ફિલ્મ કલકત્તાના રેડ લાઇટ એરિયામાં જીવતી સ્ત્રીની વાર્તા છે જેની આઠ વર્ષની દીકરી છુપાછુપી રમતા એક ટ્રકમાં જઈ ચડે છે અને એ ટ્રક નીકળી પડતા તેની દીકરી ક્યાંક ખોવાઈ જાય છે. એ સ્ત્રીની પોતાની ખોવાયેલી દીકરીને શોધવાની વાર્તા એટલે ‘કાશી રાઘવ’. દીક્ષા જોશી અને જયેશ મોરે સહિત ફિલ્મમાં શ્રુહદ ગોસ્વામી, ભરત ઠક્કર, કલ્પના ગાગડેકર,  બાળ કલાકાર પિહુ અને વિશાલ ઠક્કર જેવા અનેક કલાકારો જોવા મળશે. ફિલ્મની વાર્તા અને ડિરેક્શન ધ્રુવ ગોસ્વામીના છે. આ ફિલ્મ એટલા માટે પણ ખાસ બની જાય છે કે કેમકે ફિલ્મમાં બાંગલા ભાષી અનેક સંવાદો અને ગીતો સામેલ કરવામાં આવ્યા છે જે ફિલ્મને વધારે રોચક બનાવે છે. 

 

જાન્યુઆરીના બીજા અઠવાડિયામાં ‘મોમ તને નહીં સમજાય’ અને ‘પપ્પાનો ઇન્શ્યૉરન્સ’ આ બે ફિલ્મો વચ્ચે ક્લેશ થવાનો છે. ‘મોમ તને નહીં સમજાય’ ફિલ્મ ‘જયસુખ ઝડપાયો’ ના ડિરેક્ટર ધર્મેશ મહેતા લઈને આવ્યા છે જેમાં રશ્મિ દેસાઈ અને અમર ઉપાધ્યાય સહિત વ્રિતી વાઘાણી, નમિત શાહ, હેમાંગ દવે, તેજલ વ્યાસ જેવા અનેક કલાકારો જોવા મળશે. ‘પપ્પાનો ઇન્શ્યૉરન્સ’ ફિલ્મની વાત કરીયે તો એમાં પરિક્ષીત તમાલિયા અને આંચલ શાહ સાથે ટીકુ તલસાણિયા, મૌલિકા પટેલ, દીપા ત્રિવેદી અને દર્શન સોની મુખ્ય ભૂમિકામાં જોવા મળશે. નોંધનીય છે કે 30 દિવસના ગાળામાં પરિક્ષીતની રિલીઝ થનારી આ બીજી ગુજરાતી ફિલ્મ છે. આ પહેલા તે 20 મી ડિસેમ્બરે રિલીઝ થયેલી ‘31st’ માં જોવા મળ્યો હતો. 

17 મી જાન્યુઆરીના રોજ લીલા મોહન પ્રોડક્શન સુપરસ્ટાર હિતેન કુમાર અને કાજલ ઓઝા વૈદ્યને ચમકાવતી ફિલ્મ ‘તારો થયો’ રિલીઝ કરશે જેમાં વ્યોમા નંદી, સની પંચોલી, રિવા રાચ્છ અને નમન ગૌર અભિનય કરતા જોવા મળશે. હિતુ કનોડિયા આ ફિલ્મમાં મહેમાન કલાકાર તરીકે જોવા મળશે. ફિલ્મની વાર્તા કાજલ ઓઝા વૈદ્યની જ છે. ફિલ્મ ‘તારો થયો’ મોટી ઉમરે કરાતા પ્રેમના એકરાર પર આધારિત વાર્તા છે જે દર્શકોને આકર્ષવાનો પ્રયાસ કરશે. 

ઉતરાણ બાદ 24 મી જાન્યુઆરીએ ‘ઉંબરો’ ઓળંગવાનો છે, કેમ કે ‘હેલ્લારો’ અને ‘કમઠાણ’ જેવી ફિલ્મો આપ્યા બાદ અભિષેક શાહ ‘ઉંબરો’ નામની મહિલાપ્રધાન ફિલ્મ લઈને આવી રહ્યા છે જે સાત સ્ત્રીઓની લંડન ટૂર પર આધારિત છે. આ ફિલ્મમાં વંદના પાઠક, કાજલ ઓઝા વૈદ્ય, તેજલ પંચાસરા, સુચેતા ત્રિવેદી, દીક્ષા જોશી, તર્જની ભાડલા અને વિનીતા જોશી જોવા મળશે જેમને લંડનની ટૂર કરાવશે આર્જવ ત્રિવેદી અને સંજય ગલસાર. આ ફિલ્મની વાર્તા સાત એવી સ્ત્રીઓની આસપાસ ફરે છે જે પોતાના જીવનમાં કોઈના કોઈ પ્રકારનો ઉંબરો વટાવી વેકેશન માણવા લંડન ઉપડે છે. નોંધનીય છે કે કાજલ ઓઝા વૈદ્ય અને દીક્ષા જોશીની જાન્યુઆરીમાં જ રિલીઝ થનાર આ બીજી ફિલ્મ છે. 

જાન્યુઆરી મહિનાનો અંત ફૈઝલ હાશમી દ્વારા ડિરેક્ટ ફિલ્મ ‘ફાટી ને?’ થી થશે જે એક હોરર કોમેડી ફિલ્મ છે. આ ફિલ્મમાં હિતુ કનોડિયા પરમ લાલ અને કિશોર કાકા ફેમ એવા કોમેડિયન સ્મિત પંડ્યા પદમ લાલ નામનું પાત્ર ભજવશે. મૂળત: ફિલ્મ ‘ફાટી ને?’ પહેલા એપ્રિલ 2023માં રિલીઝ થવાની હતી પણ કેટલાક કારણોસર તેને મોકૂફ રાખવામાં આવી હતી. પ્રાપ્ત જાણકારી મુજબ આ ફિલ્મમાં મોશન કેપ્ચર ટેક્નોલોજીનો ઉપયોગ કરવામાં આવ્યો છે જે કોઈપણ ગુજરાતી ફિલ્મમાં પહેલા ક્યારેય કરવામાં આવ્યો નથી. જાન્યુઆરી મહિનામાં આવી રહેલી ફિલ્મોની આ ભરતી કેટલી માત્રામાં દર્શકોને પોતાની તરફ આકર્ષે છે એ જોવા જેવું રહેશે.

- આર.જે. સચીન વજાણી (નાચીઝ) / કાજોલ વજાણી

- dhollywoodtalkies@gmail.com